PDG - Castell-nedd Port Talbot

Rhagarweiniad

Mae gan Gastell-nedd Port Talbot Grŵp Addysg PDG gyda chynrychiolaeth amlasiantaeth o'r Gyfarwyddiaeth Gwasanaethau Cymdeithasol (Gwasanaethau Plant a Phobl Ifanc), y Gyfarwyddiaeth Addysg, TTI ac Iechyd.  Mae'r grŵp wedi paratoi 'Cynllun Strategol ar gyfer Gwella Cyflawniad Addysgol Plant sy'n Derbyn Gofal Cyhoeddus’.  Mae'r cynllun hwn wedi cyfeirio gwaith paratoi y cynnig gwariant RHAGORI cychwynnol hwn.  Ffurfiwyd grŵp tasg a gorffen, a oedd yn cynnwys swyddogion Addysg a Gwasanaethau Plant i lunio'r cais am grant.

Cynnig 2008 - 2011

Mae Castell-nedd Port Talbot yn bwriadu parhau i gyflogi 'Gweithiwr Prosiect' amser llawn a fydd yn ategu darpariaeth dechrau a diwedd dydd CNPT ar gyfer plant sy'n derbyn gofal drwy hwyluso pecynnau priodol o gefnogaeth astudio ychwanegol i blant a phobl ifanc sy'n derbyn gofal gan Gastell-nedd Port Talbot ar y camau trosglwyddo hanfodol yn eu gyrfaoedd ysgol, gyda ffocws clir ar Gyfnod Allweddol 4.  Bydd y Gweithiwr Prosiect wedi'i leoli gyda'r tîm Partneriaeth PDG amlasiantaeth sydd eisoes wedi'i sefydlu, lle mae cysylltiadau gydag iechyd, addysg, timau gwaith cymdeithasol a CAMHS eisoes yn bodoli.   Bydd y Gweithiwr Prosiect yn trefnu:

• Cefnogaeth gwricwlaidd ddwys - cefnogaeth tiwtora/astudio ychwanegol.

• Prynu adnoddau cwricwlwm a/neu ganllawiau adolygu i ategu'r ddarpariaeth TGCh sydd eisoes ar gael i blant sy'n derbyn gofal gan CNPT.

• Gwobrwyon priodol am ymdrech a chyflawniad gan unigolion.

Darperir y gefnogaeth hon ar y cyd â staff o ddarpariaeth yr awdurdod ar gyfer addysg mewn lleoliad heblaw'r ysgol. Gyda'r prif ffocws ar flynyddoedd 10 ac 11 a ffocws ychwanegol ar flynyddoedd 6 a 7, bydd hefyd:

• Yn cwrdd â phobl ifanc, gofalwyr maeth/rhieni a staff yr ysgol i nodi anghenion datblygiadol, cryfderau ac anawsterau unigol y person ifanc.

• Yn llunio rhaglenni unigol o gefnogaeth wedi'u teilwra i ddiwallu anghenion y person ifanc ac adeiladu ar dargedau eu CAP.

• Yn cefnogi pobl ifanc naill ai'n unigol neu mewn grwpiau bach i'w helpu i fod yn ddysgwyr annibynnol.  Bydd hyn yn cynnwys cefnogaeth e-ddysgu a hyfforddiant ar-lein.

• Darparu cefnogaeth benodol i helpu disgyblion i ailintegreiddio i ysgol brif ffrwd o UCD neu gyfnodau eithrio.

• Sicrhau bod pob person ifanc ym Mlwyddyn 10 ac 11 yn derbyn cyngor gyrfaoedd, yn llunio dyheadau ar gyfer y dyfodol ac yn hybu symud i addysg uwch a phellach neu at ddysgu sy'n seiliedig ar waith.

• Yn sicrhau bod pob person ifanc yn derbyn cefnogaeth briodol er mwyn cynorthwyo trosglwyddo llwyddiannus o'r ysgol gynradd i'r ysgol uwchradd.

• Darparu hyfforddiant i ofalwyr maeth a rhieni i'w galluogi i gefnogi pobl ifanc yn well gyda'u haddysg.

• Yn monitro ac yn adolygu cynnydd a chyflawniad – yn ymgysylltu gydag ysgolion yng Nghastell-nedd Port Talbot ac mewn awdurdodau lleol eraill.

• Yn gweithio gyda darparwyr pecynnau addysg y tu allan i'r ysgol a chartrefi gofal preswyl annibynnol y bwriedir eu sefydlu yn CNPT yn ystod yr hydref 2006.

Caiff y grant ei ddefnyddio i ariannu Gweithiwr y Prosiect ac athrawon/mentoriaid dysgu i ddarparu cefnogaeth astudio ychwanegol.  Cyflogir yr olaf wrth yr awr i ddiwallu angen a nodir.  Bydd yr arian hefyd yn cael ei ddefnyddio i dalu costau teithio, adnoddau a deunyddiau, a rheoli a goruchwylio.   

Crynodeb o weithgareddau a'u heffaith ar fywydau pobl ifanc

Newidiadau mewn lefelau cyrhaeddiad:

Cafwyd effaith gadarnhaol ar lefelau cyrhaeddiad dros y tair blynedd y mae'r prosiect wedi bod ar waith gyda gwelliant cyson yng ngraddau TGAU a chyflawniad.  Bu newid sylweddol o'r graddau lefelau is gyda mwy o ddisgyblion yn ennill graddau C+. Mae'r siart isod yn dangos gwelliant graddau arholiad dros dair blynedd olaf disgyblion blwyddyn 11 oedd yn derbyn gofal am fwy na 28 niwrnod yn ystod y flwyddyn academaidd.

Canlyniadau arholiadau PDG Castell-nedd Port Talbot 2007 - 2010

Mentrau eraill a gyflwynwyd:

Creu canllaw sgiliau astudio ar gyfer arholiadau i helpu pobl ifanc i ddeall sut maent yn dysgu ac yn cofio gwybodaeth orau ac yna cymhwyso'r wybodaeth honno yn yr arholiadau. Fe'i dosbarthwyd i holl ddisgyblion blynyddoedd 10 ac 11.

Bu llythrennedd yn bryder i nifer o bobl ifanc sy'n derbyn gofal. Felly, ar y cyd â'r Tîm Sgiliau Sylfaenol, cafwyd arian i hyfforddi 2 aelod o staff o bob un o'n hysgolion uwchradd yn y cynllun llythrennedd 'Catch Up', gyda'r amod mai plant sy'n derbyn gofal fyddai'n cael y flaenoriaeth. Darparwyd fersiwn Gymraeg 'Dal i Fyny' hefyd.

Mae'r prosiect wedi cynnig ariannu aelod o staff o bob un o ysgolion uwchradd ac UCD CNPT i fynd i weithdy BAAF ar 'Attachment in the Classroom'.

Parhau i weithio ar y cyd â Choleg CNPT. Trefnwyd Cwrs Sgiliau Astudio eleni, a chynhaliwyd y rhaglen dros gyfnod o 6 wythnos. Roedd yn agored i flynyddoedd 10 ac 11. Trefnwyd ymweliadau gyda'r Coleg â Phrifysgol Fetropolitan Abertawe.

Prynu 100 o leoedd ar y rhaglen ddysgu ryngweithiol SAM. Rhoddir cyfrineiriau unigol i ddisgyblion a nodwyd i gyrchu rhaglen ddysgu SAM i'w helpu i weithio ar unrhyw bwnc. Gall y Swyddog Prosiect Addysg osod gwaith ar gyfer unigolion, a gallant weld pan fydd disgyblion wedi cwblhau tasgau a'r sgorau a gafwyd.

Newid mewn ymddygiad ac agwedd:

Mae mwy o bobl ifanc yn elwa ar weithgareddau eraill a drefnwyd megis chwaraeon/gweithgareddau antur sy'n cynnwys sgiliau allweddol gwahanol megis 'gweithio gydag eraill', 'gwella fy nysgu fy hun' a 'datrys problemau’.   Mae'r gweithgareddau hyn yn datblygu hunan-barch a hunanhyder, ac yn gwella gallu pobl ifanc i weithio ar y cyd â'u cyfoedion a staff ysgol, felly maent yn ymgysylltu'n fwy llwyddiannus â dysgu. Cynorthwywyd dau o'n pobl ifanc i gael lleoedd yng ngwersyll haf y Comisiwn Cydraddoldeb a Hawliau Dynol.  Roeddent yn ddau o dri pherson ifanc yn unig a ddewiswyd o Gymru i gymryd rhan mewn gweithgareddau antur awyr agored a dadleuon am gydraddoldeb a hawliau dynol.

Adborth:

Caiff ffurflenni adborth eu hanfon at ysgolion, gofalwyr a phobl ifanc ar ddiwedd pob blwyddyn academaidd. Mae'r adborth hwn wedi bod yn gadarnhaol ac ymysg rhai o'r sylwadau ar effaith y prosiect y mae: "Mae ein disgyblon PDG wedi gwneud cynnydd aruthrol mewn mathemateg yn arbennig. Roedd y tiwtora mathemateg o werth hanfodol ac ni allaf orbwysleisio ei bwysigrwydd." Pennaeth Cynorthwyol, Ysgol Gyfun Cwmtawe 'Mae'r Swyddog Prosiectau wedi darparu gwasanaeth rhagorol yn ein hysgol.Yn fuddiol i helpu disgyblion gyda'u gwaith ysgol, sgiliau astudio a helpu i godi eu hunan-barch'.SENCo Ysgol Gyfun Dyffryn 'Mae'r gefnogaeth a gafwyd wedi cael effaith uniongyrchol a bydd hefyd o fudd ar gyfer y dyfodol' - Pennaeth Cynorthwyol, Ysgol Gyfun Dŵr y Felin. 'Yn fuddiol iawn i unrhyw fyfyriwr ym mlwyddyn 10-11' - Gofalwr. 'Mae'r gefnogaeth a gafodd xxxxx wedi ei helpu'n fawr iawn' Gofalwr 'Mae'r tiwtora wedi rhoi mwy o hyder i mi ac wedi helpu llawer iawn gyda mathemateg' - Disgybl blwyddyn 7 'Rwy wedi mwynhau ac mae wedi helpu llawer mewn mathemateg. Mae wedi gwella graddau fy arholiadau ym mathemateg' - Disgybl blwyddyn 11 'yn ddefnyddiol iawn gyda phethe roeddwn i wedi eu anghofio' -Disgybl blwyddyn 11.