PDG - Ceredigion

Bu ALl Ceredigion yn unol â strategaeth RHAGORI Plant sy’n Derbyn Gofal yn rhedeg cyfres o fentrau i wella cyflawniad addysgol Pobl Ifanc yn y system gofal.  Mae’r mentrau wedi targedu carfanau penodol o Blant sy’n Derbyn Gofal, sef rhai Blwyddyn 9, 10 ac 11.  Nod y strategaeth yw cynnig cymorth penodol a strwythuredig i bob Plentyn sy’n Derbyn Gofal ym Mlynyddoedd 9, 10 ac 11 i gyflawni eu potensial yn llawn a chael achrediad cydnabyddedig ar ddiwedd Blwyddyn 11.  Mae’r mentrau a fabwysiadwyd yn annog disgyblion i ymgysylltu a chyflawni, maent yn cwrdd ag anghenion disgyblion sydd ag anawsterau Emosiynol ac Ymddygiadol ac yn cefnogi unigolion sy’n dewis dilyn llwybr addysgol amgen.

Cefndir a chyd-destun

Mae Ceredigion yn awdurdod gwledig gyda phoblogaeth o tua 75,000.  Mae ei phrif economi’n dibynnu ar dwristiaeth ac amaeth.  Mae gennym 68 o ysgolion cynradd a 7 o Ysgolion Uwchradd prif ffrwd.  Yn ogystal, datblygwyd Canolfannau Dysgu ac Addysgu, canolfannau arbenigol oddi ar y safle, i gynnig darpariaeth EOTAS ar gyfer disgyblion yng Nghyfnod Allweddol 4.  Mae gan Geredigion boblogaeth ysgol o tua 10.000 o ddisgyblion.  Mae mwyafrif y disgyblion yng Ngheredigion yn mynychu ysgol brif ffrwd.  Does dim cyfleusterau UCD yng Nghyfnod Allweddol 3 ac mae nifer fach o’r disgyblion yn cael eu haddysgu y tu allan i’r sir o ganlyniad i anawsterau penodol.  Hyd yn hyn, bu gan Geredigion tua 75 o ddisgyblion  yn Derbyn Gofal gan yr Awdurdod Lleol ar unrhyw un adeg.

Ffocws yn nhermau gweithgareddau RHAGORI/mentrau allweddol

Prif ffocws strategaeth RHAGORI yw codi lefelau cyflawniad addysgol yng Nghyfnod Allweddol 4.  Am fod y garfan yn gymharol fach, llwyddodd Ceredigion i gwrdd ag anghenion unigolion, yn bennaf trwy bennu mentoriaid a thiwtoriaid, comisiynu Ieuenctid Cambria Youth i gefnogi disgyblion oedd ag anawsterau Emosiynol ac Ymddygiadol, sicrhau bod yr holl ddisgyblion yn cael mynediad i gyfrifiaduron personol a meddalwedd priodol, yn ogystal â chefnogi a chynyddu pecynnau addysg amgen os a phan oedd angen.  Cynigiwyd mentoriaid i’r holl ddisgyblion sydd ym Mlynyddoedd 9, 10 ac 11 ar hyn o bryd.  Pan ymgysylltodd y mentoriaid yn dda, gan ffurfio perthynas bositif â’r person ifanc, bu’r canlyniadau’n rhai positif iawn.  Mae wedi rhoi cysondeb i’r person ifanc, yn enwedig pan na fu’r lleoliadau’n llwyddiannus.  I gefnogi’r rôl fentora, dynodwyd tiwtoriaid i ddysgu’r bobl ifanc os a phan oedd angen.  Mae’r tiwtoriaid wedi canolbwyntio ar y pynciau craidd yn bennaf.  Gweithiodd y strategaeth hon yn dda o ran cefnogi pobl ifanc, yn enwedig y rhai a newidiodd ysgol yn ystod y flwyddyn academaidd.  Mae datblygu Canolfannau Dysgu ac Addysgu yn y tair ardal yng Ngheredigion wedi sicrhau cwricwlwm mwy cynhwysol sy’n cynnig dewis arall lleol ar gyfer y bobl ifanc hynny sy’n methu ymdopi ag addysg brif ffrwd. Mae’r cwrs ACCIPIO wedi galluogi myfyrwyr anodd eu cyrraedd i gael mynediad i gyrsiau TGAU trwy gyfrwng y cyfrifiadur.  Mae strategaeth RHAGORI Plant sy’n Derbyn Gofal wedi galluogi Ceredigion i ariannu rhai pynciau ychwanegol ar gyfer rhai pobl ifanc sy’n dilyn ACCIPIO os a phan fo angen.  Galluogodd y fenter hon rhai pobl ifanc i barhau i ddilyn cyrsiau oedd o ddiddordeb iddynt yn ogystal â phynciau craidd. Bu comisiynu Ieuenctid Cambria Youth yn llwyddiant mawr.  Mae Ieuenctid Cambria Youth wedi llwyddo i ymgysylltu â phobl ifanc anodd eu cyrraedd gyda rhaglenni unigol.  Gweithiodd y rhaglenni un i un ar hunan-barch ac ymddygiad derbyniol.  Cytunir ar y rhaglenni fel rhan o raglenni Cymorth Bugeiliol, a thrafodir y nod a’r amcanion ar ddechrau’r sesiynau. Mae strategaeth RHAGORI Plant sy’n Derbyn Gofal wedi cael effaith bositif ar ddysgu a lles y disgyblion trwy gynnig

• Cymorth ychwanegol i astudio – mentoriaid/tiwtoriaid;
• Datblygu cysylltiadau rhwng y cartref a’r ysgol;
• Datblygu cyfleusterau TGCh ychwanegol;
• Cynyddu mynediad ac adnoddau mewn canolfannau galw heibio i gefnogi addysg;
• Cymorth i reoli ymddygiad;
• Y cyfle i bobl ifanc fynd ar ymweliadau ysgol ychwanegol i wella’u dysgu;
• Edrych ar gyfleoedd gwahanol ar gyfer achrediad;

Mae strategaeth RHAGORI Plant sy’n Derbyn Gofal, yn ogystal â mentrau eraill, wedi cael effaith bositif ar allu ysgolion unigol i gwrdd ag anghenion disgyblion sydd dan anfantais.  Mae rhai ysgolion wedi manteisio ar gyfleoedd hyfforddi ysgol gyfan, gan gynnwys cyflwyniadau gan  ‘Geese Theatre’. Bydd nifer o agweddau’r prosiect yn gynaliadwy.  Rhennir canlyniadau’r prosiect, gan gynnwys cyflawniad addysgol, gydag aelodau allweddol o’r tîm rheoli yn yr Adran Addysg a’r Adran Gwasanaethau Cymdeithasol fel ei gilydd.  Mae nifer o agweddau’r prosiect yn cyd-fynd ag amcanion craidd y Cynllun Plant a Phobl Ifanc ac fe’u hystyrir felly’n flaenoriaethau sir gyfan.  Mae strategaeth RHAGORI Plant sy’n Derbyn Gofal yn fenter amlasiantaethol, gyda chydweithwyr o’r adran Gwasanaethau Cymdeithasol a’r Adran Addysg yn cydweithio i gynorthwyo pobl ifanc i gyflawni eu potensial yn llawn.  Ar ddechrau’r flwyddyn academaidd, cynhelir cyfarfod amlasiantaethol ag aelodau allweddol o staff y ddwy adran, sy’n cytuno ar flaenoriaethau ac yn gwerthuso’r cynnydd presennol. Mae’r prosiect yn ei bedwaredd flwyddyn erbyn hyn.  Bu’r mentora’n llwyddiannus a phan lwyddwyd i ymgysylltu’n dda, bu’r mentoriaid yn gymorth ac yn eiriolwyr ar ran y bobl ifanc.  Bu comisiynu cwmni allanol i weithio ar brosiectau un i un yn llwyddiant.  Mae’r disgyblion dan sylw wedi ymgysylltu’n dda â’r arweinwyr a chafodd hynny ddylanwad positif ar eu hymgysylltiad ag addysg.  Mae pob un o’r bobl ifanc a nodwyd ar gyfer cymorth o’r fath yn parhau i fod yn rhan o  addysg brif ffrwd ac maent yn cael mynediad i un ai cwricwlwm cenedlaethol llawn neu gwricwlwm amgen lleol sy’n fwy perthnasol.  Gan fod y nifer o Ddisgyblion sy’n Derbyn Gofal yn gymharol fach, bu modd i Geredigion fabwysiadu dull mwy unigol o gwrdd ag anghenion penodol pobl ifanc.