Ar ddydd Mawrth 10 Chwefror 2009, cynhaliwyd Diwrnod Ewropeaidd Defnyddio’r Rhyngrwyd yn Fwy Diogel y Comisiwn Ewropeaidd am y 6ed tro lle'r oedd Cyngor Ewrop yn tynnu sylw at ei waith gydag aelod-wladwriaethau a gwledydd y tu allan i Ewrop yn taclo pob mathau o ffurfiau ar gamddefnyddio’r Rhyngrwyd a’i wneud yn fwy diogel i blant ei defnyddio.

Diwrnod Ewropeaidd Defnyddio’r Rhyngrwyd yn Fwy Diogel - Fideo

Fel aelod o Gyngor y DU ar Ddiogelwch Plant ar y Rhyngrwyd, trefnodd Llywodraeth Cynulliad Cymru ddigwyddiad ar y cyd â Phafiliwn Ieuenctid Butetown a WISE KIDS lle'r oedd 11 o bobl ifanc yn cael y cyfle i rannu eu harferion yn defnyddio’r Rhyngrwyd a mynegi eu barn hwy ar ddiogelwch ar y Rhyngrwyd i Jane Hutt AC, y Gweinidog dros Blant, Addysg a Dysgu Gydol Oes.

Bu’r plant ifanc yn cymryd rhan mewn gweithdy hyfforddiant undydd yn gwneud gwaith rhagbaratoadol gyda WISE KIDS, yn dysgu am dechnolegau newydd ar y Rhyngrwyd ac yn archwilio materion yn ymwneud â Diogelwch ar y Rhyngrwyd.  Buont yn defnyddio adnoddau cyfryngau digidol (lluniau, fideos, sain a meddalwedd) i recordio eu syniadau a’u hargraffiadau hwy.  Ar gyfer Diwrnod Ewropeaidd Defnyddio’r Rhyngrwyd yn Fwy Diogel aethant ati i baratoi cyflwyniad gan dynnu sylw at yr elfennau cadarnhaol a negyddol o ddefnyddio’r Rhyngrwyd ar gyfer pobl ifanc; aeth rhai ohonynt ati i gyfansoddi cân ‘rap’ yn cynnwys negeseuon ynghylch defnyddio’r Rhyngrwyd yn ddiogel i bobl ifanc (a fideo i gyd-fynd a’r gân); hefyd aethant ati i baratoi crynodeb o’r prif bwyntiau i’r Gweinidog dros Addysg ar sut y maen nhw’n credu y gellir helpu pobl ifanc i ddefnyddio ac i ymgysylltu â’r Rhyngrwyd mewn ffyrdd sy’n ystyrlon ac yn berthnasol i’w hanghenion ac sy’n eu grymuso ac yn eu hannog i wneud penderfyniadau deallus.

Dyma’r prif bwyntiau a gododd o’r diwrnod:

• y brwdfrydedd y mae pobl ifanc yn ei ddangos pan yn defnyddio TGCh a pha mor bwysig yw hi fod ganddynt fynediad at y Rhyngrwyd a chyfleusterau technoleg ar gyfer addysg, cymdeithasu a mynegi eu hunain;

• y sgiliau y maent yn eu datblygu “ar eu pen eu hunain” wrth ddefnyddio TGCh y tu allan i’r dosbarth;

• eu dymuniad cryf bod gan bobl ifanc fynediad at TGCh a’u bod yn cael y cyfle i ddysgu technolegau “bywyd go iawn” trwy ddefnyddio rhaglenni fel Amazon a Bebo;

• bod cyfleodd ar gael i ddefnyddio TGCh – gan gynnwys dyfeisiau llaw aml-gyfrwng – er mwyn gwneud gwasanaethau ieuenctid yn fwy deniadol i bobl ifanc;

• nid yw’r cwricwlwm ar gyfer TGCh y cawsant brofiad ohono yn yr ysgol yn adlewyrchu’r hyn yr oeddent am ei ddysgu na’r sgiliau sydd eu hangen arnynt yn yr unfed ganrif ar hugain fel eu bod yn gallu cyrraedd eu nodau mewn bywyd;

• mae angen mwy o gyngor ar bobl ifanc gan ysgolion ar sut i ddiogelu eu hunaniaeth pan maent ar-lein a beth i’w wneud mewn sefyllfaoedd anodd ar-lein – gan gynnwys pwy i gysylltu â hwy os ydynt yn cael eu heffeithio gan seiberfwlio neu feirysau;

• Dylai fod yna lai o flocio gwefannau ar draws awdurdodau lleol – dylai pobl ifanc allu defnyddio safleoedd rhwydweithio cymdeithasol yn ystod amser cinio ac ar ôl ysgol ac mewn canolfannau ieuenctid.

Beth yw’r cam nesaf?

Bydd Llywodraeth Cynulliad Cymru’n adlewyrchu’r farn a fynegwyd gan y cynrychiolwyr yn nigwyddiad Diwrnod Ewropeaidd Defnyddio’r Rhyngrwyd yn Fwy Diogel trwy ei gynnwys yn ei gyfraniad at y strategaeth sy’n cael ei datblygu gan Gyngor y DU ar Ddiogelwch Plant ar y Rhyngrwyd a sefydlwyd gan y Prif Weinidog yn 2008.

Ar hyn o bryd, mae Prosiect Cydgasglu Band Eang y Sector Cyhoeddus yng Nghymru yn adolygu ymarferoldeb datblygu gwasanaethau band eang i ysgolion allai gynnwys gwahanol lefelau o ffiltro ar lefel ysgolion cynradd ac ysgolion uwchradd.

Bydd tîm Strategaeth TGCh APADGOS yn trafod y canlynol gydag awdurdodau lleol ac eraill ar hyd a lled Cymru:

• pa gyngor pellach i’w roi i ddisgyblion, athrawon a rhieni ar Ddiogelwch Defnyddio’r Rhyngrwyd;

• canllawiau ar sut gall ysgolion ddefnyddio technolegau 2.0 y we yn ddiogel ac yn effeithiol (gan gynnwys rhwydweithio cymdeithasol) er mwyn gwella dysgu ac addysgu;

• beth yw’r ffordd orau o hybu defnydd hyderus, creadigol ac arloesol o dechnoleg i gynorthwyo ysgolion i gyflawni’r cwricwlwm cenedlaethol diwygiedig ar gyfer TGCh a gaiff ei gyflwyno o fis Medi 2008 ymlaen;

• sut i wella cyfleusterau TGCh sy’n cael eu cynnig gan wasanaethau ieuenctid;

• sut i ymgorffori prif negeseuon Diwrnod Ewropeaidd Defnyddio’r Rhyngrwyd yn Fwy Diogel yn ein cynlluniau ar gyfer cynllun peilot gliniaduron Cymru’n Un.

Llawer o ddiolch i bawb a fu’n cymryd rhan yn y digwyddiad rhagorol hwn!